PILATUS Lordyngis that are lymett to the lare of my liaunce,
Ye schappely schalkes and schene for to schawe,
I charge you as your chiftan that ye chatt for no chaunce,
But loke to youre lord here and lere at my lawe.
As a duke I may dampne you and drawe.
Many bernys bolde are aboute me,
And what knyght or knave I may knawe
That list noght as a lord for to lowte me,
I sall lere hym
In the develes name, that dastard, to dowte me.
Ya, who werkis any werkes withoute me,
I sall charge hym in chynes to chere hym.
Tharfore, ye lusty ledes within this lenght lapped,
Do stynte of youre stalkyng and of stoutnes be stalland;
What traytoures his tong with tales has trapped,
That fende for his flateryng full foull sall be falland.
What broll overebrathely is bralland
Or unsoftely will sege in ther sales,
That caysteffe thus carpand and calland
As a boy sall be broght unto bales.
Talkes not nor trete not of tales,
For that gome that gyrnes or gales,
I myself sall hym hurte full sore.
ANNA Ye sall sytt hym full sore, what sege will assay you.
If he like not youre lordshippe, that ladde, sall ye lere hym
As a pereles prince full prestly to pay you,
Or as a derworth duke with dyntes sall ye dere hym.
CAYPHAS Yaa, in faythe ye have force for to fere hym,
Thurgh youre manhede and myght bes he marred;
No chyvalrus chiftan may chere hym,
Fro that churll with charge ye have charred
. . .
In pynyng payne bees he parred.
ANNA Yaa, and with schath of skelpys yll scarred
Fro tyme that youre tene he have tasted.
PILATUS Now certes, as me semes, whoso sadly has soght you,
Youre praysyng is prophetable, ye prelates of pees;
Gramercy, youre goode worde, and ungayne sall it noght you,
That ye will say the sothe and for no sege cese.
CAYPHAS Elles were it pité we appered in this prees,
But consayve how youre knyghtes ere command.
ANNA Ya, my lord, that leve ye no lese,
I can telle you, you tydes sum tythandis
PILATUS Se, they bring yoone brolle in a bande.
We sall here nowe, hastely at hand,
What unhappe before Herowde he had.
I MILES Hayll, lovelyest lorde that evere lawe led yitt,
Hayll, semelyest undre sylke on evere ilka syde,
Hayll, stateliest on stede in strenghe that is sted yitt,
Hayll, liberall, hayll, lusty to lordes allied.
PILATUS Welcome, what tydandis this tyde,
Late no langgage lightly nowe lette you.
II MILES Sir Herowde, ser, it is noght to hyde,
As his gud frende grathely he grete yowe
In what manere that evere he mete you,
By hymselfe full sone wille he sette you
And sais that ye sall not dissever.
PILATUS I thanke hym full thraly, and ser, I saie hym the same,
But what mervelous materes dyd this myron ther mell?
I MILES For all the lordis langage his lipps, ser, wer lame.
For any spirringes in that space no speche walde he spell,
Bot domme as a dore gon he dwell.
Thus no faute in hym gon he fynde
For his dedis to deme hym to qwell,
Nor in bandis hym brathely to bynde.
He sente hym to youreself, and assynde
That we, youre knyghtis, suld be clenly enclyned,
And tyte with hym to you to trus.
PILATUS Syrs, herkens, here ye not what we have oppon hand?
Loo, howe there knyghtes carpe that to the kyng cared.
Syr Herowde, thai say, no faute in me fand,
He fest me to his frenschippe, so frendly he fared.
Moreover, sirs, he spake, and noght spared,
Full gentilly to Jesu, this Jewe,
And sithen to ther knyghtis declared
How fawtes in hym fande he but fewe
He taste hym, I telle you for trewe,
For to dere hym he demed undewe,
And sirs, thee sothly saie I.
CAIPHAS Sir Pilate, oure prince, we prelatis nowe pray you,
Sen Herowde fraysted no ferther this faitour to flaye,
Resayve in your sall ther sawes that I saie you;
Late bryng hym to barre and at his berde sall we baye.
ANNA Ya, for and he wende thus by wiles away,
I wate wele he wirke will us wondre;
Oure menye he marres that he may,
With his seggynges he settes tham in sondre
With his blure he bredis mekill blondre;
Whills ye have hym, nowe haldes hym undir,
We sall wery hym away yf he wynne.
CAYPHAS Sir, no tyme is to tarie this traytour to taste,
Agayne Ser Cesar hymselfe he segges and saies
All the wightis in this world wirkis in waste
That takis hym any tribute, thus his teching outrayes.
Yitt forther he feynes slik affraies
And sais that hymself is God Son;
And ser, oure lawe leggis and layes
In what faytour falsed is fon
Suld be slayne.
PILATUS For no schame hym to shende will we shon.
ANNA Sir, witnesse of this wanes may be wonne,
That will tell this withowten any trayne.
CAYPHAS I can reken a rable of renkes full right
Of perte men in prese fro this place ar I pas
That will witnesse, I warande, the wordis of this wight,
How wikkidly wrought that this wrecche has:
Simon, Yarus, and Judas,
Datan and Gamaliell,
Neptalim, Levi, and Lucas,
And Amys this maters can mell
Ther tales for trewe can they telle
Of this faytour that false is and felle
And in legyng of lawes ful lithre.
PILATUS Ya, tussch, for youre tales, thai touche not entente;
Ther witnesse I warande that to witnesse ye wage,
Some hatred in ther hartis agaynes hym have hent
And purpose be this processe to putt doun this page.
CAIPHAS Sir, in faith us fallith not to fage;
Thai are trist men and true, that we telle you.
PILATUS Youre swering, seris, swiftely ye swage,
And no more in this maters ye mell you,
ANNA Sir, dispise not this speche that we spell you.
PILATUS If ye feyne slike frawdis, I sall felle you,
For me likis noght youre langage so large.
CAYPHAS Oure langage is to large, but youre lordshipp releve us,
Yitt we both beseke you, late brynge hym to barre;
What poyntes that we putte forth, latt your presence appreve us;
Ye sall here how this harlott heldes out of herre.
PILATUS Ya, butt be wise, witty, and warre.
ANNA Yis, sir, drede you noght for nothyng we doute hym.
PILATUS Fecche hym, he is noght right ferre;
Do, bedell, buske thee abowte hym.
PRECO I am fayne,
My lorde, for to lede hym or lowte hym,
Uncleth hym, clappe hym, and clowte hym;
If ye bid me, I am buxhome and bayne.
Knyghtis, ye er commaundid with this caityf to care
And bryng him to barre, and so my lord badd.
I MILES Is this thy messege?
PRECO Ya, sir.
I MILES Than move thee no mare,
For we ar light for to leppe and lede forthe this ladd.
II MILES Do steppe furth, in striffe ert thou stadde,
I uphalde full evyll has thee happed.
I MILES O, man, thy mynde is full madde
In oure clukis to be clowted and clapped,
II MILES Thou bes lassched, lusschyd, and lapped.
I MILES Ya, rowted, russhed, and rapped,
Thus thy name with noye sall be noysed.
II MILES Loo, this sege her, my soverayne, that ye for sente.
PILATUS Wele, stirre noght fro that stede, but stande stille thare;
Bot he schappe som shrewdnesse, with shame bese he shente,
And I will frayst, in faith, to frayne of his fare.
CAIPHAS We, outte, stande may I noght, so I stare.
ANNA Ya, harrowe, of this traytour with tene.
PILATUS Say, renkes, what rewth gars you rare?
Er ye woode or wittles, I wene,
What eyles you?
CAYPHAS Out, slike a sight suld be sene.
ANNA Ya, allas, conquered ar we clene.
PILATUS We, ere ye fonde, or youre force fayles you?
CAYPHAS A, ser, saugh ye noght this sight, how that ther schaftes schuke
And thez baneres to this brothell thai bowde all on brede?
ANNA Ya, ther cursed knyghtes by crafte lete them croke
To worshippe this warlowe unworthy in wede.
PILATUS Was it dewly done thus, indede?
CAIPHAS Ya, ya, sir, oureselfe we it sawe.
PILATUS We, spitte on them, ill mott thai spede.
Say, dastardes, the devyll mote you drawe,
How dar ye
Ther baners on brede that her blawe
Lat lowte to this lurdan so lawe?
O, faytouris, with falshed, how fare ye?
III MILES We beseke you and tho seniouris beside you, sir, sitte,
With none of oure governaunce to be grevous and gryll,
For it lay not in oure lott ther launces to lett,
And this werke that we have wrought it was not oure will.
PILATUS Thou lise, harstow, lurdan? Full ille,
Wele thou watte if thou witnes it walde.
IV MILES Sir, oure strengh myght noght stabill tham stille,
They hilded for ought we couthe halde,
V MILES For all oure fors, in faith, did thai folde
As this warlowe worschippe thai wolde,
And us semid, forsoth, it unfittyng.
CAIPHAS A, unfrendly faytours, full fals is youre fable;
This segge with his suttelté to his seett hath you sesid.
VI MILES Ye may say what you semes, ser, bot ther standerdes to stabill,
What freyke hym enforces full foull sall he be fesid.
ANNA Be the devyllis nese, ye ar doggydly diseasid,
A, henne harte, ill happe mot you hente.
PILATUS For a whapp so he whyned and whesid,
And yitt no lasshe to the lurdan was lente,
Foul fall you.
III MILES Sir, iwisse, no wiles we have wente.
PILATUS Shamefully you satt to be shente,
Here combred caystiffes, I call you.
IV MILES Sen you lykis not, my lord, oure langage to leve,
Latte bryng the biggest men that abides in this land
Propirly in youre presence ther pousté to preve;
Beholde that they helde nott fro thei have thaim in hand.
PILATUS Now ye er ferdest that evere I fand,
Fy on youre faynte hertis in feere;
Stir thee, no langer thou stande,
Thou bedell, this bodworde thou bere
Thurgh this towne.
The wyghtest men unto were
And the strangest ther standerdis to stere,
Hider blithely bid tham be bowne.
PRECO My soverayne, full sone sall be served youre sawe,
I sall bryng to ther baneres right bigg men and strange;
A company of kevellis in this contré I knawe
That grete ere and grill, to the gomes will I gange.
Say, ye ledis botht lusty and lange,
Ye most passe to Ser Pilate apace.
I MILES If we wirke not his wille it wer wrang;
We are redy to renne on a race
PRECO Then tarie not, but tryne on a trace
And folow me fast to his face.
II MILES Do lede us; us lykes wele this lake.
PRECO Lorde, here are the biggest bernes that bildis in this burgh,
Most stately and strange if with strenght thai be streyned.
Leve me, ser, I lie not, to loke this lande thurgh,
Thai er myghtiest men with manhode demened.
PILATUS Wate thou wele, or ellis has thou wenyd?
PRECO Sir, I wate wele, withoute wordis moo.
CAIPHAS In thy tale be not taynted nor tenyd.
PRECO We, nay, ser, why shuld I be soo?
PILATUS Wele than,
We sall frayst er they founde us fer fro.
To what game thai begynne for to go,
Sir Cayphas, declare tham ye can.
CAIPHAS Ye lusty ledis, nowe lith to my lare:
Schappe you to ther schaftis that so schenely her schyne,
If yon barnes bowe the brede of an hare,
Platly ye be putte to perpetuell pyne.
I MILES I sall holde this as even as a lyne.
ANNA Whoso schakis, with schames he shendes.
II MILES I, certayne, I saie as for myne,
Whan it sattles or sadly discendis
Whare I stande,
When it wryngis or wronge it wendis.
Outher bristis, barkis, or bendes,
Hardly lat hakke of myn hande.
PILATUS Sirs, waites to ther wightis that no wiles be wrought,
Thai are burely and brode, thare bost have thai blowen.
ANNA To neven of that nowe, ser, it nedis right noght,
For who curstely hym quytes, he sone sall be knawen.
CAYPHAS Ya, that dastard to dede sall be drawen,
Whoso fautis, he fouly sall falle.
PILATUS Nowe knyghtis, sen the cokkis has crowen,
Have hym hense with hast fra this halle
Do stiffely steppe on this stalle,
Make a crye and cautely thou call,
Evene like as Ser Annay thee sais.
[They cry] Oyes.
ANNA Jesu, thou Jewe of gentill Jacob kynne,
Thou nerthrist of Nazareth, now nevend is thi name,
Alle creatures thee accuses; we commaunde thee comme in
And aunswer to thin enemys, deffende now thy fame.
Et Preco, semper post Annam, recitabit “judicatur Jesus.”1
CAYPHAS We, out! we are shente alle for shame,
This is wrasted all wrange, as I wene.
ANNA For all ther boste, yone boyes are to blame.
PILATUS Slike a sight was nevere yit sene.
My comforth was caught fro me clene,
I upstritt, I my myght noght abstene
To wirschip hym in wark and in witte.
CAYPHAS Therof mervayled we mekill what moved you in mynde
In reverence of this ribald so rudely to ryse.
PILATUS I was past all my powre, thogh I payned me and pynd;
I wrought not as I wolde in no maner of wise.
Bot syrs, my spech wele aspise,
Wightly his wayes late hym wende;
Thus my dome will dewly devyse,
For I am ferde hym in faith to offende
ANNA Than oure lawe were laght till an ende
To his tales if ye treuly attende.
He enchaunted and charmed oure knyghtis.
CAYPHAS Be his sorcery, ser, youreselffe the soth sawe,
He charmes oure chyvalers and with myscheffe enchaunted.
To reverence hym ryally we rase all on rowe,
Doutles we endure not of this dastard be daunted.
PILATUS Why, what harmes has this hatell here haunted?
I kenne to convyk hym no cause.
ANNA To all gomes he God Son hym graunted,
And liste not to leve on oure lawes.
PILATUS Say, man,
Consayves thou noght what comberous clause
That this clargye accusyng thee knawse?
Speke, and excuse thee if thou can.
JESUS Every man has a mouthe that made is on molde
In wele and in woo to welde at his will,
If he governe it gudly like as God wolde
For his spirituale speche hym not to spill.
And what gome so governe it ill,
Full unhendly and ill sall he happe:
Of ilk tale thou talkis us untill
Thou accounte sall, thou cannot escappe.
PILATUS Sirs myne,
Ye fonne, in faithe, all the frappe,
For in this lede no lese can I lappe,
Nor no poynte to putt hym to pyne.
CAIPHAS Withoute cause, ser, we come not this carle to accuse hym,
And that will we ye witt as wele is worthy.
PILATUS Now I recorde wele the right, ye will no rathere refuse hym
To he be dreven to his dede and demed to dye;
But takes hym unto you forthe
And like as youre lawe will you lere,
Deme ye his body to abye.
ANNA O, Sir Pilate, withouten any pere,
Ye wate wele withouten any were
Us falles not, nor oure felowes in feere,
To slo no man, yourself the soth say.
PILATUS Why suld I deme to dede than withoute deservyng in dede?
But I have herde al haly why in hertes ye hym hate.
He is fautles, in faith, and so God mote me spede;
I graunte hym my gud will to gang on his gate.
CAIPHAS Nought so, ser, for wele ye it wate,
To be kyng he claymeth with croune,
And whoso stoutely will steppe to that state
Ye suld deme, ser, to be dong doune
PILATUS Sir, trulye that touched to tresoune,
And or I remewe, he rewe sall that reasoune
And or I stalke or stirre fro this stede.
Sir knyghtis that ar comly, take this caystiff in keping;
Skelpe hym with scourges and with skathes hym scorne;
Wrayste and wrynge hym to, for wo to he be wepyng,
And than bryng hym before us as he was beforne.
I MILES He may banne the tyme he was borne;
Sone sall he be served as ye saide us.
ANNA Do wappe of his wedis that are worne.
II MILES All redy, ser, we have arayde us,
To this broll late us buske us and brayde us
As Ser Pilate has propirly prayde us.
III MILES We sall sette to hym sadly sone.
IV MILES Late us gete of his gere, God giffe hym ille grace.
I MILES Thai ere tytt of tite, lo, take ther his trasshes.
III MILES Nowe knytte hym in this corde.
II MILES I am cant in this case.
IV MILES He is bun faste, nowe bete on with bittir brasshis.
I MILES Go on, lepis, harye, lordingis, with lasshes
And enforce we this faitour to flay hym.
II MILES Late us driffe to hym derfly with dasshes,
Alle rede with oure rowtes we aray hym
And rente hym.
III MILES For my parte I am prest for to pay hym.
IV MILES Ya, sende hym sorow, assaye hym.
I MILES Take hym that I have tome for to tente hym.
II MILES Swyng to this swyre, to swiftely he swete.
III MILES Swete may this swayne for sweght of oure swappes.
IV MILES Russhe on this rebald and hym rathely rehete.
I MILES Rehete hym, I rede you, with rowtes and rappes.
II MILES For all oure noy, this nygard he nappes.
III MILES We sall wakken hym with wynde of oure whippes.
IV MILES Nowe flynge to this flaterer with flappes.
I MILES I sall hertely hitte on his hippes
II MILES Fra oure skelpes not scatheles he skyppes.
III MILES Yitt hym list not lyft up his lippis,
And pray us to have pety on his paunch.
IV MILES To have petie of his paunche he propheres no prayere.
I MILES Lorde, how likis thou this lake and this lare that we lere you?
II MILES Lo, I pull at his pilche, I am prowd payere.
III MILES Thus youre cloke sall we cloute to clence you and clere you.
IV MILES I am straunge in striffe for to stere you.
I MILES Thus with choppes this churll sall we chastye.
II MILES I trowe with this trace we sall tere you.
III MILES All thin untrew techyngis thus taste I,
IV MILES I hope I be hardy and hasty.
I MILES I wate wele my wepon not wast I.
II MILES He swounes or sweltes, I swarand.
III MILES Late us louse hym lightyly, do lay on your handes.
IV MILES Ya, for and he dye for this dede, undone ere we all.
I MILES Nowe unboune is this broll, and unbraced his bandes.
II MILES O, fule, how faris thou now, foull mott thee fall.
III MILES Nowe because he oure kyng gon hym call,
We will kyndely hym croune with a brere.
IV MILES Ya, but first this purpure and palle
And this worthy wede sall he were
I MILES I am prowd at this poynte to apper.
II MILES Latte us clethe hym in ther clothes full clere
As a lorde that his lordshippe has lorne.
III MILES Lange or thou mete slike a menye as thou mett with this morne.2
IV MILES Do sette hym in this sete as a semely in sales.
I MILES Now thryng to hym thrally with this thikk thorne.
II MILES Lo, it heldes to his hede, that the harnes out hales.
III MILES Thus we teche hym to tempre his tales,
His brayne begynnes for to blede.
IV MILES Ya, his blondre has hym broght to ther bales;
Now reche hym and raught hym in a rede
For his septure it serves indede.
I MILES Ya, it is gode inowe in this nede,
Late us gudly hym grete on this grounde.
Ave, riall roy and rex Judeorum!
Hayle, comely kyng, that no kyngdom has kende;
Hayll, undughty duke, thi dedis ere dom,
Hayll, man unmyghty, thi menye to mende.
III MILES Hayll, lord without lande for to lende,
Hayll, kyng, hayll knave unconand.
IV MILES Hayll, freyke, without forse thee to fende,
Hayll, strang, that may not wele stand
I MILES We, harlott, heve up thy hande,
And us all that thee wirschip are wirkand
Thanke us, ther ill mot thou thryve.
II MILES So late lede hym belyve and lenge her no lenger,
To Ser Pilate, oure prince, oure pride will we prayse.
III MILES Ya, he may synge or he slepe of sorowe and angir,
For many derfe dedes he has done in his dayes.
IV MILES Now wightly late wende on oure wayes,
Late us trusse us, no tyme is to tarie.
I MILES My lorde, will ye listen oure layes?
Here this boy is ye bade us go bary
II MILES We ar combered his corpus for to cary,
Many wightis on hym wondres and wary.
Lo, his flessh al be beflapped that fat is.
PILATUS Wele, bringe hym before us as he blisshes all bloo.
I suppose of his seggyng he will cese evermore.
Sirs, beholde upon hight and ecce homoo,
Thus bounden and bette and broght you before.
Me semes that it sewes hym full sore,
For his gilte on this grounde is he grevyd,
If you like for to listen my lore.
. . .
[PILATUS] For propirly by this processe will I preve
I had no force fro this felawshippe this freke for to fende.
PRECO Here is all, ser, that ye for sende;
Wille ye wasshe whill the water is hote?
Tunc lavat manus suas.
PILATUS Nowe this Barabas bandes ye unbende,
With grace late hym gange on his gatis
Where ye will.
BARABAS Ye worthy men, that I here wate,
God encrece all youre comely estate,
For the grace ye have graunt me untill.
PILATUS Here the jugement of Jesus, all Jewes in this stede:
Crucifie hym on a crosse and on Calverye hym kill.
I dampne hym today to dy this same dede;
Therfore hyngis hym on hight uppon that high hill;
And on aythir side hym I will
That a harlott ye hyng in this hast.
Methynkith it both reasoune and skill
Emyddis, sen his malice is mast,
Ye hyng hym.
Then hym turmente, som tene for to tast.
Mo wordis I will not nowe wast,
But blynne not to dede to ye bryng hym.
CAIPHAS Sir, us semys in oure sight that ye sadly has saide.
Now knyghtis that are conant with this catyf ye care,
The liffe of this losell in youre list is it laide.
I MILES Late us alone, my lorde, and lere us na lare.
Siris, sette to hym sadly and sare,
All in cordis his coorse umbycast.
II MILES Late us bynde hym in bandis all bare.
II MILES Here is one, full lange will it laste.
IV MILES Lay on hande here.
V MILES I powll to my poure is past.
Nowe feste is he, felawes, ful fast;
Late us stere us, we may not long stand here.
ANNA Drawe hym faste hense, delyvere you, have done.
Go, do se hym to dede withoute lenger delay,
For dede bus hym be nedlyng be none.
All myrthe bus us move tomorne that we may;
Itt is sothly oure grette Sabott day,
No dede bodis unberid sall be.
VI MILES We see wele the soth ye us say.
We sall traylle hym tyte to his tree,
IV MILES Farewele, now wightely wende we.
PILATUS Nowe certis, ye are a manly menye.
Furth in the wylde wanyand be walkand.
bound; law; allegiance; (see note)
handsome men; fair; appear
jabber in no wise
damn; (i.e., execute)
shall put; chains; (i.e., punish)
men; space enclosed
Stop; moving about must cease
wretch very noisily; brawling
loudly; men; halls
caitiff; talking; calling
man; grins; complains
(i.e., he will be sorry); man; challenge
quickly to please
worthy; blows; harm
make him fear
is he hurt
punishment; chastised; (t-note)
[line missing, see textual note]
beneficial; peace; (see note)
unbeneficial; [be for] you
see; are coming
believe; lie; (t-note)
are owed some
wretch (brawler); bonds (tied up)
hear; (see note)
expounded until now; (t-note)
each and every; (t-note)
place [in this world]; established yet
at this time
hold you back
good; courteously; greets; (see note)
lazy fellow; reveal
dumb; door; remain
harm; not warranted
endeavored; deceiver; punish
beard; bay (shout)
sayings; at odds
bluster; breeds; dissension
Against; he speaks; (see note)
gives him; injures [us]
call up; crowd; good men; (t-note)
clever; a crowd; ere
(i.e., are irrelevant)
has taken hold
feign such; punish
excessive; (see note)
(i.e., have him brought)
we fear nothing [concerning] him
(i.e., get about it)
Unclothe; beat; clout; (see note)
rascal (reprobate); go
urge; more; (t-note)
go quickly; lead; (t-note)
in trouble are; placed
insist great; occurred
clutches; beaten; struck
lashed, beaten; surrounded
shouted at; struck violently; hit
annoyance; broadcast; (t-note)
spot; (see note)
Unless he fashions; trick
try; question; practices; (t-note)
am astonished; (see note)
fellows; affliction causes; roar
are; mad; strength fails
worthless fellow; on every side
(i.e., draw and quarter); (t-note)
on every side; blow (wave)
bow; rascal; low
lie, hear you, rascal (fool)
would admit it
tipped over; hold
Unknown to us
man; subtlety; sect; seized
man; attempts; discomfitted
tried [to perform]
allowed yourselves; overcome
unhappy (fainthearted) caitiffs
(i.e., bowed not once)
most fearful; found
(i.e., hold up)
obeyed; words (command)
big (strong) men
are; fierce; men; go
quickly; the way
men; live; town
Know; [only] thought [so]
ask ere; (i.e., go away)
lads; listen; orders
Take up; brightly; shine
persons; breadth; hair; (t-note)
shakes; (i.e., is disgraced)
settles; sinks down
let my hand be hacked off
speak; there is no need
abominably; repays him
death; drawn [and quartered]
On his way
staunchly; (i.e., to the dock)
rose up; in my might [could]
made a huge effort
Quickly; let; go
verdict; properly prescribe
(i.e., to behold [publicly])
By; (see note)
know; convict; (t-note)
of earth; (see note)
(i.e., accuse me of)
are mad; entire crowd
man; lying; perceive
we want you to know
pay [the penalty]
We are not allowed; (see note)
entirely; [your] hearts
well you know it
ere; go; be sorry [for]
Twist; too; until
tear off; clothes; (see note)
wretch (brawler); hurry
take off; gear (clothes); give
are pulled off quickly; ragged garments
leap (i.e., be vigorous); harry (beat)
set out; deceiver
move in on him cruelly; blows
neck, until; sweats; (t-note)
force; blows; (t-note)
annoyance; niggard; naps
strike at; blows
blows; unscathed; goes
strong; strife; bestir
course [of action]; tear
?chameleon (tarandre); (see note)
is overcome; swear [to you]; (see note)
die; deed; are
wretch; bonds (ropes); (see note)
briar; (see note)
purple (royal) garment; pall; (see note)
halls (i.e., at court); (see note)
stirring up of strife; sorrows
seize; give; reed; (see note); (t-note)
Hail, royal king; king of the Jews; (see note)
weak; dumb (worthless)
[mock] worship; working (striving)
let lead; quickly; stay here; (see note)
burdened; body; cause suffering
are astonished and curse
blushes; livid; (t-note)
high; behold the man; (see note)
(see note); (t-note)
[missing pages, see textual note]
strength; man; defend; (t-note)
Then he washes his hands; (t-note)
bonds (ropes); untie; (t-note)
granted to me
Hear; place; (see note)
criminal; hang; haste
torment; pain; experience
do not stop until
rascal; as you desire
teach; no lore; (t-note)
cords; body bind
pull until; strength
fast (secure); (see note)
dead bodies unburied
drag; quickly; cross
waning [of moon]; walking