Back to top

Robin Hood and the Sheriff of Nottingham

KNIGHT:
Syr Sheryffe, for thy sake,
Robyn Hode wull Y take.

SHERIFF:
I wyll the gyffe golde and fee,
This be-heste thou holde me.

KNIGHT:
Robyn Hode, ffayre and fre,
Vndre this lynde shot we.

ROBIN:
With the shote Y wyll,
Alle thy lustes to full-fyll.

KNIGHT:
Have at the pryke!

ROBIN:
And Y cleue the styke.

KNIGHT:
Late vs caste the stone.

ROBIN:
I graunte well, by Sent John!

KNIGHT:
Late vs caste the exaltre.
Have a foote be-fore the.

ROBIN:
Syr Knyght, ye haue a falle.

KNIGHT:
And I the, Robyn, qwyte shall.

ROBIN:
Owte on the! I blowe myn horne.

KNIGHT:
Hit ware better be vn-borne.
Lat vs fyght at ottraunce:
He that fleth, God gyfe hym myschaunce!

ROBIN:
Now I haue the maystry here:
Off I smyte this sory swyre.
This knyghtys clothis wolle I were,
And in my hode his hede woll bere.


LITTLE JOHN:
Well mete, felowe myn,
What herst thou of gode Robyn?

FRIAR TUCK:
Robyn Hode and his menye
With the Sheryff takyn be.

LITTLE JOHN:
Sette on foote with gode wyll,
And the Sheryffe wull we kyll.

FRIAR TUCK:
Be-holde wele Frere Tuke,
Howe he dothe his bowe pluke!

SHERIFF:
Yeld yow, syrs, to the Sheryffe,
Or elles shall your bowes clyffe.

LITTLE JOHN:
Now we be bownden alle in same:
Frere [T]uke, this is no game.

SHERIFF:
Co[m]e thou forth, thou fals outlawe;
Thou shall [be] hangyde and y-drawe.

FRIAR TUCK:
Now[e], allas, what shall we doo?
We [m]oste to the prysone goo,

SHERIFF:
Opy[n] the yatis faste anon,
An[d la]te theis thevys ynne gon.